بقيت كدا ليه

بقيت غامض
ومش فاهمه

بقيت كدا ليه ..؟
تكونش خلاص
بتكرهنى ..
ولو فعلا ً..؟
مكمّل ليه ..؟
بقيت عادى
ومش دايب
وغايب زى
مش غايب
وجودك جنبى

مش حساه

وفيك حاجه
بتقلقنى
وسر كبير
مانش عرفاه
لكن برضو مسيرى
اعرف
بقيت كدا ليه ..؟

خلا ص يعنى

مفيش دوبان

ولا حتى

حنين لزمان

ولا كلمه تقولهالى

تطمنى على حالى

مصير حكايتنا

مش باين

ومش قادره

أقول خاين

لكن برضو

مسيرى اعرف
بقيت كدا ليه .

...............................................

اخر ضحيه

مفيش حاجه

فيكى تريّح جريح

ولا باقى فيكى

خلاص شىء مُريح

دا حتى الحنان

اللى كان ميزه فيكى

خلاص خلًِتيه

بإصطناعك قبيح

ولا فين وكان

خلاص اللى كان

واللى هيكون كمان

مفيش ليكى فيه

م النهارده مكان

وهنضّم مُرغم

لصف الضحايا

اللى عرفوكى قبلى

وعاشوا الحكايه

وعاشوا إنكسارى

ونفس النهايه

وأرجو ان اكون بس

اخر ضحيه

واخر جريح .

.................................................

وحشتونى بجد .......... اخوكم هانى

الحاله بإختصار

الحاله بإختصار

انك سبب المرار

القصه عايشها

عادى

تجرحنى وتبقى

هادى

ومفيش فى مفرداتك

مكان للإعتزار

يبقى انت بإختصار

سبب عقلى

اللى طار

سبب للنوم

مجاشى

ياغريب

يا ابو طبع فاشى

ليلى فى

هواك نهار

حكايتنا

فشلها منك

والحل فى

بعدى عنك

قرار مفهوش

هزار........

........................

ما الذى يدعو على الاستمرار فى علاقه فاقده لابسط مقومات الحب .. فاقده للهّفه ..اللهفه فى ان ترى من تحب واللهفه فى ان تفاجأ من تحب لترى علامات الامتنان على وجهه .. اللهفه فى ان ترى اللهفه عليه .كل سنه وانتوا طيبين .

خالصين خالصين

خالصين خالصين

إحنا كدا

خالصين

جرحتنى وجرحتك

نبقى كدا

خالصين ..

شوف ياللا

فين مصلحتك

مبقاش مابنا

حنين ..

خالصين خالصين

انت اللى

بادى بالجراح

لكن خلاص

راح اللى راح

وبقينا متعادلين

خالصين خالصين

فيه اختلاف

بين الطباع

وانت مميز

فى الخداع

محترف فيه

من سنين

خالصين خالصين.

..............................

كنت فاكر انى مش هكتب اى شىء جديد فى رمضان.. مش قاصدى بوست جديد انما تأليف شىء جديد ..لكن عشان كتابة الشعرمن الاشياء المحببه لقلبى كتبت فى رمضان 4 حاجات جديده ودى واحده منهم يارب تعجبكم ..وكل سنه وانتوا طيبين .

مصر احنا

مصر احنا
ايوه احنا
هى فينا
واحنا منها ..
مصر ناس
وبيوت ولمه
مصر مش هى
الحكومه والهلومه
مصر احنا
وانجرحنا ما انجرحنا
هى روحنا..
مصر احنا
الصنايعى والمهندس
والمقاول والموظف
والدكاتره والمدرس
فلاحين وسط الغيطان
والعساكر فى الميدان
والتلامذه فى الامتحان
مصر انت
وابوك وعمك
مصر ناس شايلين
فى همك..
مصر ناسنا الطيبين
الحبايب والقرايب
والجيران ..
مصر بينا
مصر فينا
مصر مش بس المكان .
........................................
من خلال مرورى على المدونات لاحظت إن عدد كبير من المدونين بيهاجم مصروناس كتير منهم بيهاجم لمجرد الهجوم -مع العايمه يعنى -ممكن يبقى مرتاح ماديا ًومعندوش اى مشكله فى حياته بس عمل مدونه فقال هكتب ايه .. اكتب ايه ..اهاجم فى مصر وخلاص وفيه ناس مرتبط عندها المدونات بالسياسه والهجوم على مصر مين قال كدا .
ياجماعه مصر احنا ..هى مصر ايه غير ناس..هى الحكومه تبقى حكومه من غير ناس ..المبانى تنفع من غير ناس تسكنها .. النيل ينفع من غير ما يسقى اراضى للناس ..
الميادين والشوارع يبقى لها قيمه من غيرناس ..مصر كلها تبقى مصر ازاى من غيرنا ..يعنى احنا مصرومصر احنا .
ياريت كل واحد وكل واحده بيهاجموا مصر يراجعوا نفسهم شويه ويفكروا .. انا عارف ان الحكومه والنظام ولاد 60 فى 70 بس ليه نقول مصر ونعمم نهاجم بشكل موضوعى شويه نقول الحكومه كان مفروض تعمل كذا واحنا كان لازم نعمل كذا قول اللى ليك واللى عليك .
من هنا ادعوكم كلكم (إن وافقتم طبعا ً) لتكوين جروب فى حب مصرونسميه مثلا ً(مصر احنا او احنا مصر) ويبقى لنا شعارعباره عن صوره فيها نماذج من المجتمع ناس بتمثل كل الطبقات وفى خلفية الصوره برج القاهره وهرم ومركب .. دا تصور مبدئى ممكن نناقشه باستفاضه بعد كدا والموافق على الجروب هتبقى الصوره دى شعار عنده فى المدونه زى شعار مدونه نظيفه وكدا.
ويبقى اسمنا عملنا حاجه فى حب مصر .
بلادى وان جارت على عزيزة ........ واهلى وان ضنوا على كرام
منتظركم.......................... اخوكم هانى

رمضان كريم

كل سنه وكلكم بالف خير والسنه الجايه زى دلوقت يكون كل واحد حقق كل احلامه او بعض منها.. واحتمال ابعد شويه فى رمضان للتفرغ للعباده ..بس هبقى امر على مدوناتكم هو انا اقدر استغنى..

انا شفت ياما قلوب كدا

معقول تكون فعلا ًكدا

قاسى وانانى كبير كدا

انا شفت ياما

قلوب كدا

لكن ماكنتش يوم اصدق

انك تكون فعلا ًكدا

كان الكلام منك حنان

والقرب من قلبك امان

وفى حبك انت

وصلت لأبعد م الجنان

وفجأه الاقى كل دا

مبقاش كدا

خدت الحكايه معاك بجد

وعشقت عشق ما عشقه حد

والشوق معاك كان كل يوم

بيذيد وعمره ما كانله حد

إيه اللى ضيّع كل دا

وخلاك كدا

............................

كل سنه وكل اللى بيقرا الكلام طيب ويارب يكون كلامى بيعجبكم .